في حالة صارتلك مشكلة صحية و إنت في الخارج، شركة التأمين ترجعلك حق الدواء ، كان استحقيت عملية اللطف عليك وإلا مبات فالسبيطار و بقية تكاليف العلاج في حدود المبلغ اللي تفاهمتو فيه من الأول
هنا عنا زوز حالات :
إذا لا قدر الله مرضت و انت مسافر و الطبيب متاعك غادي شاف اللي حالتك الصحية تستوجب تروح، هنا شركة التأمين تتكفل بحق النقل و المراقبة طبية حتى توصل للسبيطار وإلا لدارك.
إذا حالتك الصحية ماتستوجبش مرواح لتونس، هنا لاسيرونص متاعك تتكفل بحق الأمبيلونس كان إستحقيتها و إلا أي وسيلة نقل أخرى استعملتها.
كان لا قدر الله مرضت غادي واستحقيت تقعد في الخارج بعد المدة المبرمجة، شركة التأمين ترجعلك حق الوتيل في المدة الزايدة حسب ما تفاهمتو فيه كيف عملت لاسيرونص.
في حالة مرض اللي عمل السيڨورتا هذي وإقامتو في سبيطار لمدة معينة، شركة التأمين تتكفل بالتنقل متع الولي باش يرافق ولدو وإلا بنتو من و إلى تونس.
لا قدر الله اللي عمل السيڨورتا هذي ربي حبوا، شركة التأمين تتكفل برجوعو لتونس
في حالة إستحقيت دواك اللي مستانس تاخذ فيه و إنت في الخارج وباش يبعثوهولك مستعجل و موش موجود منو في البلاد اللي إنت فيها، شركة التأمين تتكفل بتكاليف البعثان
شركة التأمين تعاونك في مرحلة التلويج على الباقاج متاعك كن ضاعلك ، وكان تلقاه هي زادة تتكفل بجيبانو
في حالة صارتلك مشكلة قانونية في الخارج ، شركة تأمين ترجعلك تكاليف الدفاع قدام المحكمة
في وقتنا توا تزادت الحاجة على ضمان يعوضلنا إذا مرضنا بالكوفيد، لاسيرونص هذي ترجعلك :
حق تاست مبرر من عند طبيب
حق الدواء كان طلع بوزيتيف
فلوس المبات في السبيطار كان إستحقيت
تكاليف الرجوع لتونس كان استوجبت حالتك الصحية اللطف عليك
