Segurta كراهب
كيف نقولو أسيرونص ديراكت تجي في بالنا أسيرونص الكرهبة، كما نعرفو الكلنا هي مفروضة علينا و ماتنجم حتى كرهبة تسركل و هي موش مسوڨرة. السيڨورتا هاذي تعوضلك إذا الكرهبة تضربت، إذا إنت ضربت كرهبة أخرى، دخلت في حاجة وإلا كان تسببت في ضرر لغيرك تولي شركة التأمين تعوض في بلاصتك
Les garanties الضمانات
Assistance المساعدة
استحقيت رموركاج, شاحت كرهبتك من الإسونص، طاحت بان ولا تنقبتلك عجلة … بالسيڨورتا هذي ماعليك كان تكلم نومرو الأسيستونص وهي تجيك وين إنت أما ديما حط في بالك إنو في العادة عندك الحق في مرة بركة على كل نوع متع عطب أما كانش تولي تتفكترلك وتخلصها من جيبك
Tous Risques كل اضرار الحوادث
اسمها على جسمها، السيڨورتا هاذي ترجعلك إذا كرهبتك دخلت في كرهبة أخرى وإلا أي حاجة أخرى, إذا الكرهبة زلقت ، تضربت و وإلا تقلبت أما ديما ثبت كان الكوارث طبيعية داخلة و وإلا لا خاطر فالعادة الضمان هذا تخلص عليه وحدو وموش داخل في التوريسك
Dommages et collision اضرار التصادم
بالسيڨورتا هذي شركة التأمين ترجعلك إذا كرهبتك دخلت في كرهبة أخرى تعرف مولاها وإلا ضربت حيوان تعرف مولاه شكون. الضمان هذا يخلصلك الأضرار متاع التصادم إلي صارت للكرهبة متاعك الفرق بين الاسيرونص هذي و التوريسك إنو هنا لازم تكون الحاجة اللي اصطدمت بكرهبتك تكون معروفة مش قمت تلقاها مضروبة ولا فما شكون ضربك وهرب
Bris de glace كسر البلور
شركة التأمين ترجعلك كان البلار القدامي, شبابك وإلا البلار التالاني متاع كرهبتك على حسب المبلغ اللي في الكونترا متاعك
Vol سرقة
شركة التأمين تعوضلك كان الكرهبة تسرقت وإلا تضرت في محاولة متاع سرقة أما لازم المحاولة تبدا معها تكسير يا لبواتا ، الاقفال وإلا الأجهزة الالكترونية. حاجة أخرى الفلوس اللي باش ترجعهملك لاسيرونص ينقصو ب 10% على كل حاجة من هاذم الزوز، يا إما سرقة الكارت ڨريز وإلا خليت الشبابك محلولة. زادة باش تخلص لازم يبدا عندك الزوز مفاتح متاع كرهبتك
Incendie الحريق
السيڨورتا هاذي تعوضلك إذا تحرقت كرهبتك . رد بالك راك متخلصش على الحريقة إذا كان الكرهبة تسرقت، إذا تحرقت جراير السخنة بركة والسياقة في حالة سكر …
Conducteur السائق
السيڨورتا هذي تعوض إذا اللي يسوق فالكرهبة صارلو حادث و صارلو سقوط في بدنو وإلا في حالة وفاة لا قدر الله و تضمن فلوس للورثة. هنا لازم نفكروكم اللي إذا كان السائق هو الغالط في الحادث شركة التأمين متعوضش لعايلتو حسب ضمان المسؤلية المدنية ، هذاك علاه عملوا ضمان هذا باش يصير التعويض أما حسب المبلغ اللي متفاهمين فيه في العقد من الأول.