شنعمل توا !! أول سؤال يجي لمخك إذا لا قدر الله صارلك حادث و تضريت. وحدة وحدة مع بعضنا تو نشوفو اللي لازم نعملوه الكل بش نضمنو إنو نستنفعو من السيڨورتا متاعنا بأحسن طريقة ممكنة
الكلنا معرضين لبرشة أنواع متاع مخاطر هاذاك علاش نستعملو السيڨورتا باش نحميو روحنا، صغارنا، وممتلكاتنا وهكاكة انقصوا من تأثير الحاجات الخايبة اللي تنجم تمسنا
إذا لا قدر الله عملت حادث بكرهبتك و في حالة اضرار للكرهبة كهو
أول حاجة لازمك تحرص عليها هي الكونستا معمر بالصحيح ومصحح من عندك ومن عند السائق الأخر
مع الكونستا تهز شهادة التأمين ورخصة السياقة متاعك لوكالة التأمين اللي مسوڨرعندها كرهبتك أي باهي جبنا الأوراق! شنية مراحل التعويض و مبعد شنية باش يصير ؟ تبع معنا للاخر
أهم حاجة لا قدر الله صار حادث بكرهبتك هي تعمير الكونستا خاطر المؤمن متاعك يعوضلك على حسب المعطيات اللي حطيتهم وقتها
كفاش باش نعمروه الكونستا؟ هو جبنالكم شوية نصائح
- أول حاجة لازم تبدا عندك الوثائق هذوما: شهادة تأمين، رخصة سياقة وبطاقة رمادية متاع كرهبتك
- لازمك تجاوب على الأسئلة الكل حتى السؤالات اللي تبانلك بسيطة برشة
- تثبت من صحة رقم عقد التأمين متاعك اللي موجود في شهادة التأمين وزادة تثبت من سيري الكراهب المتداخلة في الحادث
- تحط علامة قدام الخانة اللي تعبر على الحادث كيفاش صار
في التصويرة حاول تكون أقرب ما يمكن للطريقة اللي صار بها الحادث - لازم حكايتك تكون متطابقة مع الأحداث كيما باش يكتبهم الطرف الأخر في الحادث
- الكونستا لازم تحرص إنو يكون مصحح من عندك ومن عند الطرف الأخر
- أحرص انك تعطي نسخة من الكونستا للسائق الاخر
- إذا عملت حادث مع كرهبة من خارج تونس لازمك تطلب نسخة من شهادة التأمين متاع الطرف الأخر (البطاقة الخضراء أو البطاقة البرتقالية)
- توا كهو عمرنا الكونستا بالباهي وأمورو واضحة لازم نوصلوه في أقرب فرصة للمؤمن متاعنا في أجل 5 أيام عمل في حالة حادث و 2 يوم عمل في حالة الكرهبة تسرقت
- في حالة الطرف الأخر في الحادث محبش يصحح الكونستا، حاول خوذ سيري الكرهبة و لم أكثر ما يمكن من شهود
كان الطرف الأخر في الحادث فصع تمشي بالوقت تعلم الشرطة وإلا الحرس الوطني
توه في حالة فما اضرار بدنية: أهم حاجة هنا هي سلامتك وسلامة اللي معاك هاذاك علاش ديراكت تعلم الحماية المدنية على 198 و إلا الشرطة على 197 وإلا الحرس الوطني على 193
في حالة ضرر بدني مراحل التعويض هي
إذا لا قدر الله صار ضرر لدارك شنية تعمل في حالة حريق أول حاجة تحاول تنقص مل اضرار أكثر ما يمكن تعلم المؤمن متاعك في أجل 5 أيام عمل. الإعلام هذا لازم تحط فيه المعلومات هذي: الإسم، اللقب وعنوانك. رقم عقد التأمين متاعك التاريخ اللي صار فيه الحريق سبب الحريق (كان تعرف السبب) تحاول توصف الأضرار اللي سببها الحريق وتعطي حسب التقريب قيمة الأضرار
توة عملت اللي عليك ؟ نشوفو مع بعضنا مراحل التعويض
إذا دارك تسرقت لا قدر الله، هاو شنوة لازمك تعمل لازمك ما تفوتش 48 ساعة باش تعلم شركة التأمين متاعك تقدم شكاية بالوقت للشرطة أو الحرس الوطني. تحاول تعمل اللازم الكل باش تمنع الدبش اللي ماتسرقش
