سيڨورتا صحتك
سيڨورتا صحتك من أهم أنواع التأمين خاطر عندها تأثير كبيرعلى حياة العباد وعلى مستوى متع المعيشة متاعهم هذاك علاش النوع هذا متاع سيڨورتا يستعملوه الشركات كإمتياز يشجعوا بها الموظفين متاعهم ويوريوهم اللي هوما يهمهم فيهم
معلومات عامة على سيڨورتا صحتك
أول حاجة لازم نعرفوها على سيڨورتا صحتك هو اللي التعويض ينجم يكون حسب زوز حالات :
الحالة الأولى: الصندوق الوطني للتأمين على المرض الكنام ترجعلك مصاريف الطبيب والدواء و شركة التأمين تكملك بقية الفلوس خاطر الكنام مترجعش الفلوس كاملة
الحالة الثانية: إنت ماتعديتش بالكنام، شركة التأمين هنا تولي هي اللي ترجعلك فالعادة بين ثمانين و تسعين بالمية
باهي وكفاه تجم تعرف في قداه عندك الحق ترجعلك السيڨورتا متاعك في كل نوع متع تغطية؟ ساهلة! فما حاجة اسمها جدول التعويضات، باش نلقاو في كل نوع متاع خدمة صحية رقم و عدد معين من النقاط، كل نقطة عندها سومها. باش نعرفو في قداش عنا الحق نسترجعو على كل خدمة صحية، يكفي إنو نشوفو سوم مجموع النقاط متاعها.
أنواع سيڨورتا صحتك ولا
Maladie et maternité المرض والولادة
كيما قاعدين نشوفو في الإسم ، الضمان هذا يعوضلنا في حالة :
الولادة، هنا عندك الحق في مبلغ محدد تاخذوا الكل و تلقاه في جدول التعويضات باش تغطي به تكاليف الولادة و المصاريف إلي تابعتها إذا الولادة طبيعية. أما إذا الولادة بعملية قيصرية، لاسيرونص ترجعلك مصاريف العملية و ما تابعها حسب جدول التعويضات. الأم اللي خدمتها عملتلها تأمين على المرض يغطي الولادة والعجز تبقى لاسيرونص تخلصلها شهريتها بطريقة عادية لمدة توصل لشهرين.
المرض ربي يحمينا، السيڨورتا هاذي ترجعلنا مصاريف الكونسلتسيون عند الطبيب ، حق الدواء اللي عطاهولك، فلوس المبات فالسبيطار و العملية لاقدر الله ، التصاور والتحاليل، و كل ماهو بروتاز حسب ماهو محدد في جدول التعويضات على الخدمات الصحية.
Assurance décès سيڨورتا حياتك
سيڨورتا حياتك هي تأمين على الحياة في العادة يطلبوه البنوك وقت القرض أما إنجمو نعملوه وحدنا زادة. شنية حكايتها لاسيرونص هذي؟ هي تعوض فلوس معينة إذا كان اللي عمل السيڨورتا لا قدر الله ربي حبو عندو ، و ترجع للورثة متاعو وإلا المستفيدين اللي حددهم هو فالكونترا (مثلاً البنك إذا الراحل ماخذ قرض) و الهدف متاع الضمان هذا إنو يحاول يخلي العيلة متززية في غيابو على الأقل
Invalidité et incapacité العجز الدائم والمؤقت
هنا عندنا زوز أنواع متع سيڨورتا اللي هوما :
العجز الدائم هو نسبة كبيرة متاع سقوط في بدن العبد ربي يلطف بينا و اللي مش ممكن تتداوى بالوقت و ماعدش يجم يمارس خدمتو كما كان
العجز المؤقت هو سقوط كبيرة زادة أما بصفة مؤقت خاطر ممكن يداوى ومهوش بش يخليك تخدم خدمتك في مدة معينة.
هنا فما حاجة أخرى لازمنا نعرفوها اللي هي في حالة حادث عمل ، التعويض يولي ياخذوا من عندCNSS وإلا من عندCNRPS على خاطر الصناديق هذي هي اللي لاهية بتأمين حوادث الشغل، وكان معوضوش هنا تولي شركة التأمين تخلصك هي فالمبلغ وإلا الشهرية ، حسب نوع الاصابة والضمان اللي عاملينو.